October Ni 18, chawhnu dar 3 khan Pu Joel Joseph Denga, District & Sessions Judge, Aizawl Judicial District chuan Aizawl District Court-ah naupang, hursualna tuartute leh naupang an nu ten Lung-in an tanpuite leh naupang, chhan hrang hrang avanga Court-a inlan leh kal ngai te tan Child Welfare Officer’s Office leh Children’s Room te a hawng.
He hawnna programme hi Dr. HTC. Lalrinchhana, Special Judge, PC Act chuan a kaihruai a. Pu Joel Joseph Denga chu khuallian niin, heng Room-te hi hawngin Mizoram State Commission for Protection of Child Rights (MSCPCR)-in naupangte dikna chanvo humhalh a nih theihnana tangkai taka hmang turin duhsakna a hlan.
Dr. C. Lalsangzuala, Chairperson, MSCPCR in programme khuhhawnna neiin, Child Probation Officer’s Office leh Children’s Room awmchhan leh a thawktute’na an hnathawh tur ruangam te sawifiahna hun a nei a. Dr. C. Lalsangzuala chuan naupang, hursualna tuartute leh naupang, an nu ten Lung-ina an tan pui te leh, naupang, chhan hrang hrang avanga Court-a inlan ngai te tana he Office leh Room te hi siam an nih thu a sawi. Tin, naupang, Court-a chhan hrang hrang vanga kal ngaite ngaihngam taka an awm theihna turin Children’s Room siam a nib awk a. Naupangte tana hmun nuam a nih theihna turin Directorate of Women & Child Development (WCD) chuan bungrua leh hmanraw chi hrang hrangin a thuam nghal bawk a ni a ti.
Pu Joel Joseph Denga chuan, naupang, hursualna tuartuten Court-a harsatna an tawh thin tih tawp a nih theihna turin hetiang hmunhma hi mamawhna a san viau thu leh District Court zawng zawngah pawh siam zel a nih theihna turin MSCPCR chuan hma la zel thei se a tih thu a sawi a. Court building leh a chhehvelah naupang khuaikhem leh pawngsualtua puhte leh a tuartu (victims) te chu a hring a hrana inhmuh palh theihna chance a awm thin avangin a tuartu naupangte chuan Court-a evidence pek chungchangah te harsatna an tawk zui thin a, rilru lamah pawh harsatna an tawh phah thin avangin a tuartu naupangte chu \ha taka zawhna te an chhan theihna’na lo fuih a, huaisenna an neih theihna tura lo buatsaih a tul thu a sawi. Tin, Pu Joel Joseph Denga chuan, Mizoramah POCSO Victims Compensation pawh Sorkar sum harsatna avangin la pek loh tamtak an la awm thu a sawi bawk a ni.
MSCPCR chuan Aizawl District Court-a Probation Officer’s Office leh Children’s Room te siam an nih theihna’na hma latu District & Sessions Judge lo ni tawh leh ni lai mek te, Aizawl District Court-a thuneitute leh Directorate of Women & Child Development te chungah lawmthu a sawi tak meuh a ni.
