Aizawl the 27th March 2023 : Vawiin khan National Commission for Protection of Child Rights leh Mizoram Commission for Protection of Child Rights tangkawp buatsaihin ni khat awh NCPR portal chungchang zirhona hun hman a ni a. Social Welfare Minister Er. Lalrinawma chu khuallian a ni.
Er. Lalrinawma chuan naupangte, hmangaih leh duat taka kan enkawl tur ten tharum thawhna te, mipat hmeichhiat kawnga khawih khawloh te an lo tawk thin hi a lungchhiatthlak tak zet a ni, a ti a. Chaklo leh humhim ngai zawk, naupangte leh hmeichhiate hamthatna hi sawrkar pawhin a ngai pawimawh a, vawiina workshop a tel zawng zawng ten tangkai takin hun hmang se, rampum nghawng ngei se a duh thu a sawi. India sawrkarin naupangte a ngai pawimawh a, an dikna chanvo hi chiang takin Danpui (Constitution) ah pawh a tarlang a ni, Social Welfare Minister chuan a ti a. Dan tha tak tak Sawrkarin a siam a, heng dan dinglai awmsa te tha taka lek kawh a nih theih nan mitinin mawh kan phur a ni, a ti. Dan bawhchhiate hrem an nih theih nan thuhretu a tan ngam a pawimawh tih a sawi bawk a. Thudik kan hria a nih chuan huaisen takin kan tawng chhuakin kan tang ngam tur a ni, a ti a. Naupang leh hmeichhe awmnem zawkte himna turin kan zavaiin mawh kan phur tih hre thar leh turin Minister chuan mitinte a sawm a ni.
Khualzahawm Dr LH Chhuanawma pawhin thusawiin naupang te dikna chanvo, a bik takin hmeichhe naupangte humhim a tul zia a sawi a. Mizoram hmun hrang hrangah hmeichhe naupang leh mipa te pawh, an chhungkaw hnaivai tak te ngeiin mipat hmeichhiatna kawnga an khawih chhiat an awm fo, tih a sawi a. Aizawl khawpui chhungah chauh ni lo, Mizoram hmun hrang hrangah naupang te chunga pawikhawihna a thlen tawh loh nan naupang te humhimna kawngah tan lak lehzual a pawimawh a, inzirtira inhrilhriatna neih kan mamawh hle, khual zahawm chuan a ti.
Hawnna inkhawm neih zawhah hian National Commission for Protection of Child Rights, New Delhi a Legal Division Head Pi Katyayani Anand kaihhruaiin nilengin training neih a ni a. Sawihona hun hlawk takin an hmang bawk. Vawiin workshop ah hian NCPR portal hrang hrang - Monitoring App for Seamless Inspection (MASI), Go Home and Get Rehabilitated (GHAR), Out of School Children (OoSC), Baal Swaraj Portal leh MIS portal chungchang sawizauna hun hman a ni.
He programme ah hian Mizoram State Commission for Protection of Child Rights Chairman Dr C Lalsangzuala leh MHIP Chawlhhmun Branch President Pi Ramchhanzuali ten thu an sawi a. Dr David Tlaisun Thawmthanga, Intellectual Forum of North East (IFNE) chuan programme hi a kaihruai a ni.
Courtesy: DI&PR
