Fa lak leh a kaihhnawih Danin a sawite leh a kaihhnawiha mawhphurhna neiten tih tur leh tih loh tur an neihte zirhona vawiin (Friday 25, March) khan Aizawlah buatsaih a ni.
National Commission for Protection of Child Rights (NCPCR) leh Mizoram State Commission for Protection of Child Rights (MSCPCR) tangkawpin an buatsaih, zir honaah hian sorkar leh mimal damdawi in hrang hrang aiawhte an tel a, hawnna inkhawm hmanpuitu Social Rehabilitatoin Board Vice Chairman Pu K Liantlinga chuan Mizo khawtlang nunah tunhmain hmeichhia leh naupangten ngaihthah an hlawh a, hmasawnna kal chho zelah ngaihpawimawh an hlawh chho zel a, Sorkar dinglai pawhin khawtlang nun siamthat, social reform chu policy pawimawh ber zingah nei mek a ni a ti.
MSCPCR Chairperson Dr C Lalsangzuala chuan naupangte chu mahni inveng thei lo an nih avangin suahsualna kaihhnawiha hnuhluh an nih lohna turin fa lak leh a kaihhnawih chu Juvenile Justice Act hnuaiah mumal taka khuahkhirh a ni tih a sawi a, Damdawi in thuneitute chu nau piang hlim lo enkawl hmasatu an nih avangin Dan bawhchhiatna awm thei lakah an inven a ngai a ni a ti.
Women and Child Development Dept Director, Pi Lallianpuii pawhin hmeichhia leh naupangte chawikanna kawnga Dept hmalaknate a sawifiah a, Fa lak, Adoption chungchang Danin a tarlante chu Mamit Chief Judicial Magistrate Pu Laldinpuia Tlau in kalkhawmte a zirtir a, State Adoption Resource Agency, SARA Programme Manager Pi Lalmuanpuiin, fa lak kaihhnawiha Damdawi In enkawltute mawhphurhna leh an tih tur leh tih loh turte a zirtir bawk a ni.
Vawiin zir hona, One Day State Level Workshop cum Consultation on Role of Stakeholders from Private/Government Medical Institutions with Emphasis on Child Adoption tia vuahah hian MSCPCR member pathum, Pu J Malsawmzuala Vanchhawng, Dr Julie Remsangpuii Fambawl leh Pi K Malsawmzuali te pawhin thu an sawi a ni.
