Aizawl District chhunga naupang harsatna tawk leh Dan nena inrem lova che te enkawlna chungchang MSCPCR chuan March ni 16, 2023 hian MSCPCR Conference Hall ah Aizawl District huamchhunga naupang enkawlna hmun, Sawrkar leh NGO hnuai ami te nen inkawmhona a buatsaih a. He hunah hian naupang enkawlna hmun a hotu te an kal kim tha hle.
Tun dinhmun ah Aizawl District huamchhungah naupang venhim ngai leh harsatna tawk enkawlna hmun 11, fa a lak theih tur enkawlna hmun 3, pianphunga rualbanlo enkawlna 1, rilru lama harsatna nei enkawlna 1, ruihhlo in a tihbuai enkawlna 1+1 (mipa leh hmeichhia) an awm mek a, tin, dan kalha che naupang te enkawl leh kaihhruaina atan Observation Home, Place of Safety leh Special Home an awm bawk a, a vaiin Aizawl District chhungah hian CCI 21 a awm a ni. Heng hmunah te hian February, 2023 thla tawp report a tarlan nih danin naupang 435 an awm mek a ni.
He hunah hian CCI hrang hrang ten khaihlak leh harsatna an tawh theih leh hmachhawn mekte sawiho a ni a, an harsatna tawh hrang hrangte sutkian dan tur ruahmanna te sawiho a ni.
MSCPCR chuan heng naupang harsatna hrang hrangin a tlakbuak mek te hi a ngai pawimawh hle a, an mamawh ang tak enkawlna leh kaihhruaina an dawn ngei theih nan theihtawpin enzui ngai te enzuiin, CCI hrang hrang te nen hma an la mek bawk a ni. Naupangte hian hlim leh him taka chhungkaw boruak tha hnuaia seilen hi an chanvo a ni a, chuvangin an chungah engpawh lo thleng se enkawlna hmuna dah mai lova, an mamawh chhung chu chhungkaw boruak tha tem thei tura hmun lo siamsak emaw, a kawng lo dap pui hi mitin in kan tih theih a nih avangin naupang enkawlna kawngah tan kan lak tlan a pawimawh zia he hunah hian sawiho a ni.
Naupangte hi kan ram hmel lanna tur leh kan ram dinhmun than zel nana kan nghahfak an nih angin, kaihhruai leh enkawlna tha kan pek a tul takzet a. Kan ramin hma a sawn a, harsatna leh dan bawhchhiatna nasa tak kan tawh mek te sukiang a, dinhmun chhe zual zawk kan thlen loh nan, tuna naupang te hi venghim a, an nun chhuahna tur boruak tha siamsak zel hi a tul takzet a ni.
MSCPCR ah hian thawktu mi 19 – Chairperson, Member 3, Secretary bakah Administrative leh Programme lam hmalatu te an awm mek ani.
