Dated Aizawl the 13th September, 2024:
MSCPCR chuan Aizawl khawpui chhunga Child Care Institutions (CCIs) tlawhchhuahna an nei leh a; Thutak Nunpuitu Team (TNT), Muanna Veng, SIRIUS leh CRESCENT HOME, Zemabawk Lungbial ami te chu Commission Member - Pu R. Laltanpuia, Pu Darthakunga leh Pi Vanhmingliani leh Office Staff pahnih-te nen an tlawh a, CCI staff-te leh naupang enkawl mek te nen inhmelhriatna leh inkawmhona hun tha tak an hmang.
Commission member-te chuan CCI-a thawktu inpe tak tak leh thiamna nei tha tak tak tena neitu rilru pu chunga thahnemngai taka naupang leh an hmunhma te an enkawl danah fakin an chhuanawm takzet a ni tih thu an hrilh a; CCI naupang an enkawl chhung reilo tea naupangten nuam ti tak leh rilru leh thinlung zalenna hnuaia enkawlna an dawn theihnan thawktute pawimawhzia leh an inpekna ngawr ngawr piah lama naupangte siamthatna kawnga an rilru an hneh leh zual theih na'n style, tips leh tricks hrang hrangte hman thiam a pawimawh thu thawktute an hrilh bawk a ni.
CCI tlawhchhuahna neih mek a nih lai hian Commission chuan CCI Superintendent-te leh Staff-te atangin an harsatna tawh hrang hrangte an ngaihthlaksak thin a, Commission chuan a theih chin chinah leh a theih ang anga hmalak leh bawhzui ngai te a awm a nih chuan theihtawpa lo bawhzui a tum thu a hrilh zel bawk a ni.
Tin, Commission Member-te chuan Member thar an nih angin CCI hotute finchhuahna te, fuihna, puihna te leh thawhhopuina te an mamawh thu leh an duh thu pawh CCI hotute an hrilh zel bawk a ni.
