SPORTS DISCIPLINE HRANG HRANG ASSOCIATION HRUAITUTE NEN POCSO DAN ZIR HO
Dated Aizawl, the 18th September,2024 (Wednesday):
Mizoram State Commission for Protection of Child Rights (MSCPCR) chuan Lianchhiari Hall, I&PR Directorate-ah Mizoram State Sports Council hnuaia affiliated Sports Discipline hrang hrangte nen State Level Workshop for Sports Administrators on “Prevention of Sexual Abuse Among Junior Players–Challenges & Way Forward” a buatsaih.
He hun hi Pi Lalengvari, MSS, Secretary, MSCPCR chuan a kaihruai a; Pi Vanhmingliani, Member, MSCPCR chuan infiammite enkawlna leh zirtirna pe thin te tana hriat awm naupang kaihhnawih Dan leh hrai, a bik takin “The Protection of Children from Sexual Offences (POCSO) Act, 2012" chungchang zirtirna a pe a;
Khawvel pum huap thlirin, infiammite chungah hursualna avanga harsatna tawk tam tak an lo awm tawh thin a, a bik takin kum tlinglo zingah pawh a thleng fo tawh thin a ni. MSCPCR chuan kan rama a thlen ve lohna tura inven lawk a tul zia hriain tiang hun hi a buatsaih a ni.
Hursualna laka naupangte venna Dan POCSO Act, 2012 hi Dan Sakei tih hial khawpa hlauhawma sawi a ni a, a chhan pawh naupangte hi humhalh an ngaih em vang a ni. POCSO Dan hnuaiah hian a tisualtu hremna a na hle a, hursualna tuartu hian hmeichhia chiah huam lovin mipa pawh a huam tel vek a ni. Naupang pawngsual an nih hian a ti tu chu kum 20 lung-in tan emaw, damchhung lung-in tan emaw, pawisa chawi leh thi tura a chungthu rel a huam vek a. Inremtihtawnna pawh ni se, kum tlinglo a nih chuan a pawikhawihtu chuan thiam a chang thei chuanglo a ni.
Hetiang taka hremna na hi kan chunga a thlen loh a, a laka kan him tlan a tul a. Chuvangin infiammite leh anmahni enkawltute hian Dan kan hriat a pawimawh takzet a ni. Dan hriat loh hi himna a ni si lo. A nihna takah chuan, infiammite leh anmahni enkawltu – an coach te, manager te leh Association hruaitute hian infiamna kaihhnawih a thil tih ho leh in hnimhnaihna chance an nei tam a, hei vang hian mahni nau te chunga thuneihna leh thiltihtheihna remchanga lak lo tum leh naupang laka hursualna lo hmang duh an awm theih avangin kan fimkhur tlan a ngai hle a ni.
Sports Discipline hrang hranga hruaitute hian kan naute chungah hian mawhphurhna lian tak kan neih chu an himna hi a ni a. Chutih a nih lain, khawimaw laiah harsatna tawk an awm leh zauh thin hi Mizo zingah chuan thleng lo se tih chu Commission duh dan a ni a, chutiang tur chuan Sports Discipline hrang hranga hruaitu ten rilru thar pu a tan la zel turin Commission chuan Association hruaitute chu a fuih a ni.
Zirtirna pek a nih hnu hian Sports Association aiawha kalkhawmte nen zawhna leh chhanna hun leh mahni vei zawngte sawi hona hun tha tak hman zui a ni.
He hunah hian heng - Aquatic, Archery, Hockey, Arm Wrestiling, Basketball, Chess, Cycling, Football, Indigenous Games, Wrestling Association-te atangin Association hruaitute an tel a, heng hruaitu kalkhawmte duh dan angin, hun remchang ah Sports Discipline hrang hrang hnuaia Coach-te, Manager-te, Official-te, Junior Players-te tan pawh POCSO Dan zir hona buatsaih leh ngei ni se tih a ni.
