STATE LEVEL REVIEW MEETING ON IMPLEMENTATION OF JOINT ACTION PLAN (JAP) ON PREVENTION OF DRUGS & SUBSTANCE ABUSE AMONG CHILDREN AND ILLICIT TRAFFICKING
MSCPCR buatsaihin Ruihhlo laka naupangte himna tura sorkar kutke hrang hrangten tangruala hma an lakna tur ruahmanna bawhzui dan tur vawiin khan Aizawlah sawiho a ni.
National Child Rigths Commission leh Narcotic Control Bureau ten a kaihhnawih ministry dangte nen thawk hova, ruihhlo laka naupangte himna tura hmalak dan tur ruahmanna kimchang an duan, Joint Action Plan, JAP tia sawi-ah hian India rama District 272 thlan chhuah zingah Mizorama District pathum, Kolasib, Aizawl leh Champhai te a tel a, heng district pathum DC te, Mizoram Police, Excise and Narcotics Dept, Health Dept leh Education Dept te bakah naupangte enkawl leh dawmkanna kawnga thawktu sorkar kutkete chu JAP hnuaiah hian an thawkho chho mek a ni.
JAP chungchang sawihoa vawiina State Level Review Meeting neih hi Mizoram State Commission for Protection of Child Rights, MSCPCR Chairman Dr C Lalsangzuala'n a kaihruai a, Mizoramah ruihhlo avanga buai, naupang an pun chhoh zel avang leh mizo hnam tana pawi lian tak la thlen thei tur a nih avangin ruihhlo do kawngah tanrual a ngai tih Dr C Lalsangzuala hian a sawi a, ruihhlo dona kawnga kil hrang hranga thawktuten mahni hmasawn theuha hma an laknate chu hlawm khata luankhawmtir anih chuan rahchhuah tha zawk a nei thei dawn a, hnawhphui ngai laite pawh chiang zawkin a lang thei dawn a ni a ti.
Dept hrang hrang hotute chuan JAP hnuaia hmalak dan tur ruahmanna an bawhzui tawh dan leh an hmachhawpte an sawifiah a, naupangte ruihhlo laka an himna tura Dan dinglai tha leh zuala kenkawh dan tur te, naupangte ban phaka ruihhlo a awm lohna tura Damdawi dawr leh vaihlo zawrhna hmun khuahkhirhna dinglai khauh leh zuala kenkawh dan tur te huamzau takin an sawiho a ni.
