Aizawl the 9th June, 2022:
Vawiin khan Rajya Sabha MP Pu K.Vanlalvena chuan Aijal Club-ah National Commission for Protection of Child Rights leh Mizoram State Commision for Protection of Child Rights (MSCPCR) te tangkawp buatsaih 'State Level Sensitization cum Consultation Workshop on Handling POCSO Cases for Advocates of DLSAs/Procecutors, Special Juvenille Police Units & CWPOs' hawngin, he hunah hian khuallian a ni.
MP Pu K.Vanlalvena chuan thu sawiin vawiin program a khuallian tura sawm a nih avangin lawmthu a sawi a. Naupang dikna humhalh leh naupang venhim hi hnam changkang leh hmasawn a piangin an ngai pawimawh a, naupangte hi hnam rohlu ber an ni tih hria a, naupang an nih laia an chanvo humhalh chu ram leh hnam anga kan tih tur pawimawh tak a ni, a ti a. Nu leh pa, chhungten naupang zawk enkawl dan turah tihloh tur te, tih tur te kan hriat a pawimawh em em a, an mamawh ang leh an phu ang enkawlna kan pek chuan an puitling thlengin nghawng tha tak a nei thin a, an nihphung tur chherna kawngah naupan lai atanga bul tan a ngai tih hi hre thar ila. Hmalam nun (future) piah lamah naupang ten dan angin humhimna an dawng em, naupang chanvo humhalh sak an ni em tih hi zawhna inzawh fo tur leh hemi kawnga zirtirna uar zual zel turin thawktute a sawm bawk a. Vawiin a lokal ten tangkai taka an programe an hman ngei turin duhsakna a hlan a ni.
MSCPCR Member Secretary Pi Zoramthangi Chhangte chuan kalkhawm te chu lo lawmin, NCPCR Division pawhin Opening Remarks neiin, MSCPCR Chairperson Dr. C.Lalsangzuala hnen atangin thusawi tawi ngaihthlak a ni a. Sentization and Consultation Workshop ah hian Forensic Inputs in Investigation of Sexual Offences, Legal Process and Victim Compensation under POCSO Act, 2012 tih thupui hmang te in Dr. Lalringmaia, State Medico Legal Advisor Cum Police Surgeon & HoD Forensic Medicine, Civil Hospital Aizawl; Pu T. Saikunga, MJS (Rtd.) Presiding Officer, Fast Track Special Court, Champhai; Ananya Kar Sanghi, Advocate, SC of India, Former Consultant (POCSO),NCPCR te hnen atangin zir ho a ni a. Heng bakah hian MSCPCR Member, Pu J. Malsawmzuala chuan 'Way Foward Action Plan for State' chu sawiin technical session hi khar a ni.
National Crimes Record Bureau buatsaih 'Crime in India 2020' a a lan danin, kum 2020 chhungin POCSO Act 2012 hnuaiah Mizoram atangin case 105 register a ni a, North East State zingah Assam-ah case a sang ber a, Meghalaya state in dawt in, Mizoram hi a pathum na kan ni.
