MSCPCR leh Zirlai Hruaituten inkawm hona hun an nei
July ni 17, 2023, chawhma dar 11:00 khan Mizoram State Commission for Protection of Child Rights (MSCPCR) leh Zirlai Hruaitute’n MSCPCR Conference Hall-ah inkawmhona hun an nei a, MSCPCR Chairperson, Dr. C. Lalsangzuala leh Secretary, Pi Lalengvari leh Officer dangten an lo dawngsawng a ni.
He inkawm hona hunah hian MSCPCR leh Zirlai Hruaitute chuan Mizoram chhunga naupangte dikna leh chanvo humhalhna kawngah thawhhona tha an neih a tul thu an sawi ho a. MSCPCR chu Dan in thuneihna a pek angin The Right of Children to Free & Compulsory Education (RTE) Act, 2009 Dan leh a kaihhnawih te kenkawhna kawngah thuneihna a pe a, heng Dan hnuaia naupangten harsatna chi hrang hrang an tawh thin te chu he hunah hian sawi ho a ni, Dr. C. Lalsangzuala chuan kan ram-in Dan fel fai tak a nei a, Dan in a phut anga Zirna Sikul tam tak enkawl thei lo an tam thu a sawi a, Mizoram chhunga zirlai naupangte hamthatna tur leh an dikna leh chanvo humhalh a nih theih nana Zirlai Pawl anga hmalakna hrang hrang an lo neih tawh te chu fakin, Ram, Hnam leh Naupangte hmasawnna’n kawngro a neih zia a tarlang a. Zirlai Pawl Hruaitute’n Pawl anga hma an lo lak tawhna te report an pe bawk a ni.
He inkawm hona ah hian MZP hruaitute chuan Mizorama Elementary Education hi an vei thu leh a enkawltu Education Department hnena rawtna leh ngenna an thlen nasat tawh thu te an tarlang a. Sikul Fee sang chak lutuk chungchangah te leh Sikul facility in\hat hleih em em si a Sikul Fee in zat leh in ang tlang lutuk chungchang te siam that a, category-a then a that thu te; Sikul Permit pek awlsam a nih lutuk chungchangah te; Sikul building leh Class-room capacity-ina a zawh loh, naupang duh tam luat avanga enkawl zawh leh theih si loh chungchangah te; Sikul Bag rit lutuk chungchangah te; Sikul naupang leh Zirtirtu ratio in rualkhai lo lutuk chungchangah te; Thingtlang khua Sorkar Zirna Ina Zirtirtu an indaihloh em em laia Aizawl khawpui chhunga Zirtirtu tam lutuk chungchangah te vawi duai lo thu an lo thlen tawh \hin a, amaherawhchu heng chungchang tam tak hi buaipui mek an la ni rih a, a taka hmalakna tak tak hmuh tur erawh a awm meuh loh thu MZP Hruaitute chuan an sawi bawk a ni. Tin, MZP Hruaitute chuan Mizoram chhunga Hostel thenkhatte chu a him tawk loh thu an tarlang a, mipat hmeichhiat leh hursualna kaihhnawih lakah an him tawk lovin Hostel hmunhma te a fel tha tawk lo tih an sawi bawk.
Dr. C. Lalsangzuala, Commission Chairperson chuan tunhnaiah sakhuana behchhana naupang zirna sikul kai tir duh lo an awm thu Commission beng a thlen thu leh Commission in hma a lak mek thu a sawi lang a. Dr. C. Lalsangzuala chuan Zirlai Pawl te chu kum tam tak experience lo nei tawh an nih angin State Commission hnenah pawh zirlai naupangte tana hamthatna leh an hmakhua thlirpuina kawngah thurawn leh rawtna te an thlen thiam a rin thu a sawi bawk. Sakhuana leh a kaihhnawih thil avanga naupang Sikul kai tir lo chungchangah Pi Priscilla Lallawmsangi, Legal Officer chuan naupang sikul kai tir phal lo tu chu naupang dikna leh chanvo laksak tu an ni a ti a; tin, nu leh pate pawhin kan fate Sikul kan kai tir hi kan mawhphurhna a ni a ti bawk.
Pi Lalengvari, Secretary, MSCPCR chuan Zirlai Hruaitute chu kimchang tak leh mumal taka hma lak ho a nih theih nan zirlai naupangte hamthatna leh an dikna leh chanvo an hmuh theihna turin Commission hnena rawtnate an rawn thlen a tul thu a sawi a, heti ang inkawmhona lian zawk leh huam zau zawk programme te buatsaih thuai leh neih fo a that thu Zirlai Hruaitute chu a hrilh bawk a ni.
He inkawm hona ah hian MZP atangin General Secretary, Pu Jacob Lalmuanpuia leh, MZU Students Council atangin Pu R. Zomuanpuia, General Secretary, Pu Joel Lalrinsanga, Editor te an tel bawk.
