11th Oct. 2020 hi khawvel pum huapa hmeichhe naupangte tana ni bik, 'International Day of the Girl Child' a ni a, he ni lo thlengah hian hmeichhe naupangte chawikan leh venhim kawnga nasa leh zuala tanla thar turin Mizoram State Commission for Protection of Child Rights (MSCPCR) chuan Mizoram mipuite a ngen thar leh a ni.
Mizo khawtlang nunah hmeichhe naupangte hi an him lo hle. Tunhnaia hmeichhe naupangte chunga hur sualna lam hawia chetna leh hleilenna chi hrang hrang thleng thawm hriattur a awm fo hi a vanduaithlak takzet a, Mizoram Police, SP CID (Crime) office in a chhinchhiah dan chuan kumin 2020 March thla atanga August thla thleng khan naupang pawngsualna thleng POCSO Act leh IPC hnuaia thubuai ziahluh 40 lai a awm a, hei hi nikum, 2019 March thla atanga August thla chhunga thubuai ziahluh 33 aiin, 21.21% in a pung chho a ni. Hmeichhe fate venhim leh chawikan kawngah mimal tin, chhungkua leh khawtlangin nasa leh zuala tan kan lak a tul hle.
Khawvel pum huap pawhin hmeichhe naupangte dinhmun hi chawikan a la ngai hle a, hmeichhe naupang kum 5 leh 14 inkarte hian mipa naupangte aiin khawvel pum anga chhutin inchhungkhur hna darkar maktaduai 160 zetin an thawk tam zawk a, khawvel puma hmeichhe 4 zinga pakhat zelin kum an tlin hmain pasal an nei anga chhut a ni bawk. Hengte avang hian UN chuan kum 2012 atang khan International Day of Girl hi kumtin hman turin a lo puang ta a, hmeichhe naupangte thlei bikna awm thin zawng zawng tih bo te, an dikna leh chanvo humhalhsak te, an laka pawikhawihna thleng thin tih bo te, zirna tha an dawn vek theihna tur te, hriselna tha an neih theihna turte leh khawtlang leh ram inrelbawlnaa chanvo pawimawh an chan theihna tura remchanna siamsak te chu International Day of the Girl Child hman chhan langsar zual a ni a, kumin 2020 ah hian thupuiah 'My voice, our equal future' tih hman a ni. He ni pawimawh tak lo thlengah hian MSCPCR chuan hmeichhe fate himna tur leh an dikna chanvo humhalh kawngah tanla thar theuh turin Zoram mipuite a ngen a ni.
Issued by:
Mizoram State Commission for Protection of Child Rights
10th October, 2020
